GIPANIGURO ni Ozamiz City mayor Reynaldo ‘Aldong’ Parojinog, Sr., kandidato pagka-konbgresista sa ikaduhang dsitrito sa Misamis Occidental, ilalom sa Lakas-Kampi-CMD nga adunay duha ka Parojinog nga makalusot sa Mayo 10 nga piniliay.
Migawas ang pahayag ni Parojinog human nga unang mipadayag si Misamis Occidental governor Loreto Leo Ocampos, kandidato usab pagka-kongresista sa Segundo distrito sa Misamis Occidental, ilalom sa Liberal Party (LP) nga kutob lamang karong Mayo 10 ang political career sa mga Parojinog.
“Lakas-CMD will only be up to May 10 elections,” pahayag ni Ocampos. Iya usab nga gipaniguro nga siya ang modaog sa pagkakongresista.
Gisaysay ni Parojinog nga sila si Board member Ricardo ‘Ardot’ Parojinog nga nagpasubli ug councilor Nova Princess Parojinog-Echavez, kandidato pagka-mayor sa Ozamiz ang seguradong mulosot sa piniliay diin nagpasabot nga sayop ang prediksiyon ni Ocampos nga kutob na lang sila karong Mayo 10.
Una na nga gipadayag ni Ocampos sa grupo sa mga media nga 75 porsiento ang makuha niya nga boto itandi ni mayor Aldong nga 25 porsiento.
Sa iyang kabahin, gikataw-an lamang ni Parojinog ang maong prediksiyon nga ang ilang panagharong sa congressional seat dako pa ‘kaayong kombtehonon’ apan segurado na nga mulosot sila si Ardot ug Nova.
Nasayran nga misamot ang pagtubag sa pikas ug pikas human nga nahitabo ang pagpusil ni dxSY-AM volunteer reporter Edwin Segue saw ala pa mailhi nga suspek samtang kini nagmaneho sa iyang sakyanan padulong sa lungsod sa Tudela.
Sila si Ocampos ug Parojinog managkauban sa Lakas-KAMPI-CMD apan nagbulag human nga si Aldong ang gipili sa administrasyon nga congressional bet human sa tulo ka adlaw nga dsikusiyon sa Manila kon kinsa kanila ang paboran.
Gumikan niadto milukso si Ocampos sa Liberal Party uban ni Presidential bet Senador Noynoy Aquino.
Posted by MALINDANG HERALD ONLINE
|
at
3:25 PM
|
TALIWALA sa kainit sa politika nga nasinati sa lalawigan sa Misamis Occidental ilabina sa Ozamiz City, nanawagan si 2nd District Board member Henry Oaminal, kandidato sa pagka-bise gobernador ilalom sa Nacionalista Party (NP) nga magmakalma ang tanan nga katawhan aron mabatunan ang matinud-anon, hapsay ug limpiyo nga piniliay.
Ang panawagan ni Oaminal migawas human nga gipatay sa wala mailhi nga mamumuno ang iyang supporter nga si Barangay Antonio councilor Edwin Segue niadtong Abril 13 samtang nagmaneho kini sa iyang de pasahero nga sakyanan padulong sa lungsod sa Tudela.
Si Segue usa usab ka volunteer reporter gawas sa iyang trabaho isip konsehal sa barangay.
Nanawagan usab si Oaminal sa mga mipatay ni Segue nga unta hikapon ang kasingkasing niini ug motahan sa ilang kaugalingon aron tubagon ang salaod nga nahimo.
Giangkon sa board member nga anaa siya karon sa pagpangutan tungod sa kamatayon sa iyang higala, giisip nga igsoon ug numero uno niya nga taga-suporta.
Iya usab nga gikondina ang pagpatay ilabina nga iyang nailhan si Segue nga usa ka maayong tawo.
Sa iyang kabahin, gipadayag ni Vice-governor Francisco Paylaga, Jr., kandidato sa pagka-gobernador ilalom sa NP nga iyang gihangyo ang tanang hut-ong sa awtoridad nga paningkamutan nga masikop ang mga tag-sala aron mapatubag sa salaod nga nahimo pinasubay sa balaod.
“Naningkamot ta nga makuha nato ang serbisyo sa NBI (National Bureau of Investigtion) aron nga mapadali ang hustista sa kamatayon sa atong higala,” padayag ni Paylaga.
Bisan pa man nga sa daw gitumbok ni governor Loreto Leo Ocampos, kandidato pagka-kongresista sa Liberal party ang kampo ni Ozamiz City Reynaldo Parojinog, Sr., kandidato sa pagkakongresista ilalom sa Lakas-Kampi-CMD nga responsabli sa pagpatay ni Segue dali kini nga gilimod sa mayor ug mipasupot nga ‘bakakon’ ang gobernador.
Gipasabot sa mayor nga dili batasan sa mga Parojinog ang mopapatay og tawo.
Nasayran nga mipagawas usab og pamahayag-pagkondina si NP presidential candidate Manny Villar sa kamatayon ni Segue, kinsa iya usab nga dumadapig.
Sa sulat pamahayag, gipadayag ni Villar nga usa ka dakong insulto sa konstitusiyon ilabina sa press freedom ang nahitabong linuog nga pagpatay ngadto ngadto kang Segue. Gani nanawagan usab siya sa mga awtoridad nga dalion ang pagpagawas sa hustisya sa nasangpit nga linuog nga buhat.(NEPTALIE BATOLENIO)
Posted by MALINDANG HERALD ONLINE
|
at
3:22 PM
|
TALIWALA sa nasinating krisis sa kuryente adunay pipila ka mga politiko sa Misamis Occidental nga nagtinguha nga magtukod og hydro electric power plant sa lalawigan.
Gipadayag ni forester Rolando Dingal, lumilihok sa Society Advocates for Ecological Sustianability nga adunay mga politiko nga miduol kaniya ug nagpakisayod sa kapabilidad sa lalawigan sa pagtukod sa planta.
Bisan wala hinganli ni Dingal ang maong mga poltiko, iyang gisaysay nga adunay dako nga purohan nga mahimong makatukod og hydro electric power plant.
“Suwerte ang Misamis Occidental gumikan kay adunay kasubaan nga bastante ang tubig,” pasabot ni Dingal.
Suhestiyon ni Dingal nga kon dili na matabang sa hydro power plant sa Lanao del Norte labing maayo nga ipadayon ang plano nga magtukod sa Misamis Occidental.
Usa sa nakita nga potential nga mabutangan og hydro electric power plant mao ang Salug River sa Don Victoriano diin adunay waterfalls nga mahimong magamit aron mo-generate og kuryente.
Iyang gisaysay nga kini maka-supply og kuryente sa tibuok lalawigan sa Misamis Occidental.
Laing potensiyal nga dapit nga mahimo nga butangan og hydro power plant mao ang Labo River sa Ozamiz City.
Gisaysay ni Dingal anga ang Labo river kusog kaniadto ang bul-og sa tubig apan gumikan sa padayon nga pamutol og kahoy naguba ang water shed maoy hinungdan nga mihinay ang tubig.
Hinuon, posible nga mapuslan kini kon butangan og dam sa ibabaw nga bahin diin mahimo usab nga maka-generate og kuryente.
Ang Labo river dili maka-supply og kuryente sa tibuok lalawigan apan mahimo kining makahatag og kuryente sa tibuok Ozamiz City.
Tungod sa maong kahimtang, nanawagan si Dingal sa katawhan sa Misamis Occidental nga ampingan ang kinaiyahan ilabina niining panahon sa krisis sa enerhiya.(NEPTALIE BATOLENIO)
Posted by MALINDANG HERALD ONLINE
|
at
3:21 PM
|
OZAMIZ CITY--GITUOHAN nga kini ang labing unang higayon nga adunay nahitabong tulis sa Ozamiz nga naglambigit og minilyon nga kuwarta.
Sa dihang tulo ka mga empleyado sa 3 W Builders Construction Company ang gitulis sa duha ka wala mailahi nga mga tulisan niadtong Marso 23, napulo ka metros ang gilay-on padulong sa Bangko de Oro (BDO) Ozamiz Branch.
Gipadayag ni Senior police officer 3 Jerry Llamas, case investigator, nga ang tulo ka mga biktima sakay sa ilang service vehicle ug sa paghidangat niini tungod sa executive hotel kalit lamang nga giharangan sila sa duha nga nakatabon sa nawong og panyo nga mga suspetsado nga pulos armado sa kalibre 45 nga pistola.
Gituoanan ang mga biktima diin usa niini mao si Antonio Quinto, 62 anyos ug finance officer sa nasangpit nga kompanya. Nakuha sa mga suspetsado ang kuwarta nga nagkantidad og P4.5 M.
Nasayran nga ang tulo ka mga biktima gikan kini sa Land Bank of the Philippines Ozamiz Branch nga nag-withdraw sa maong kantidad aron unta i-deposito sa BDO apan walay suwerte tungod kay nabiktima sa mga tulisan.
Gituohan nga dili lamang duha ang suspek apan upat kini samtang ang duha mao ang look out. Sumala pa sa mga nakasaksi nga ang duha ka suspetsado naglakaw lamang kini nga mipahilayo.
Sa dihang gihisgutan sa dxDD-AM, ang maong hitabo daghan ang mipadayag og pagduda pinaagi sa text message nga usa ka inside job kini tungod kay wala mogamit ang mga biktima og armored car sa bangko ilabina nga dako ang maong kantidad nga i-deposito sa bangko.
Hinuon, giimbestigahan pa sa kpolisan ang maong hitabo aron mapatubag pinasubay sa balaod ang malapason.
Miugong usab ang dili klaro nga taho nga ang maong kuwarta nabalik ra kini apan walay mokompirma bisan gani ang mga awtoridad.
Posted by MALINDANG HERALD ONLINE
|
at
10:56 PM
|
OROQUIETA CITY--DILI angay nga kabalak-an ang nahitabong pagpatay sa tulo ka mga barangay kapitan ug usa ka barangay kagawad sa lalawigan sa Misamis Occidental gumikan kay walakini makatandog sa kinatibuk-an nga hulagway sa dagan sa kahusay ug kalinaw.
Gipadayag ni Misamis Occidental senior superintendent Robetr Quenery, PNP provincial director nga ang maong nahitabong pagpatay adunay personal nga motibo ug walay kalambigitan ang poltika karong Mayo 10.
Kahinumduman nga niadtong Oktobre 7, 2009, usa ka kagawad Wilfredo Pamale sa Bato, Plaridel, Misamis Occidental ang gipatay sa wala mailhi nga tagsala diin gisundan sa usa ka barangay chairman Narciso Jaro sa Maligubaan, Concepcion, MisOc nga giposil sa La Libertad, Zamboanga del Sur niadtong Disyembre 5, 2009.
Samtang usa ka Alberto Ate, kapitan sa Bagong Silang, Lopez Jaena ang giluthang usab saw ala maila nga mamumuno sa dihang mibisita kini sa lungsod sa Calamba uban sa iyang anak nga nasamdan usab niadtong higayuna, Mayo 3.
Gumikan sa maong hitabo, ang Sangguniang Panlalawigan mipasar og reolution nga nag-pawhag sa PNP, AFP ug ubang hut-ong sa awtoridad sa pagpadali sa imbestigasyon sa maong mga kaso maanaa man o walay kalambigitan ang politika.
Bag-o lang nga napasar ang maong resolosyon sa dihang laing Barangay chairman ang giposil-patay nga mao si Joel Lambaco sa Macalibre Bajo, Lopez Jaena niadtong Marso 8 sa wala mailhing suspetsado.
Sa maong talan-awon gipahimangnuan usab ni Quenery ang mga politiko ilabina nga nagsugod na ang pagpangampanya sa local nga position nga ang mga sakop lamang sa PNP, Armed Froces of the Philippines (AFP) ug ubang mga hut-ong sa awtoridad nga gi-deputized sa Comission on elections (COMELEC) ang gitugutan nga mahimong bodyguards sa mga kandidato.
Gipagawas ni Quenery ang maong pahimangno human nga adunay mga taho nga migawas nga mga sibilyan ang gihimong bodyguards sa pipila ka mga kandidato.
Posted by MALINDANG HERALD ONLINE
|
at
10:55 PM
|
PADAYON nga gipangita sa mga otoridad ang mga suspek sa pagpatay sa usa ka ABC president sa Brgy. Boro-on, Iligan City.
Naila ang biktima nga si ABC Pres. Ismael Macaton, kinsa barangay kapitan sa Brgy. Pangao, Pona Piagapo, Lanao del norte.
Padulong sa sentrong bahin sa Iligan City ang biktima aron unta motambong kasal sa dihang gipusil kini sa duha ka motorsiklo nga sakay sa motorsiklo ginamit ang 9mm pistol.
Natusak-tusak sa bala ang lawas sa barangay kapitan nga nagresulta sa iyang hinanaling kamatayon.
Gitoohan sa kapolisan nga rido ang motibo sa nasampit nga kremin.
Posted by MALINDANG HERALD ONLINE
|
at
1:57 AM
|
CAGAYAN DE ORO CITY - Gipasabot sa lokal nga buhatan sa Pag-asa niining siyudad nga wala pa hingpit masinati sa katawhan ang hulaw dinhi sa region 10 ning panahona.
Kini bisan pa nga sobra na kainit ang mihapak sa mga kaumahan sa amihanang Mindanao.
Gipadayag ni Ric Mercado sa Pag-asa nga duha ka buwan pa lamang nga walay ulan hinungdang ubos sa dry spell category pa lamang ug dili drought ang gisinati sa rehiyon.
Mokabat na sa mil-775 ka ektaryang humayan sa Northern Mindanao ang hingpit nang nadaot sa nasinatiang dry spell ning panahona.
Kini bunga sa inisyal nga assessment sa Department of Agriculture Region 10.
Matud ni Abraham Fajardo sa DA nga gikan sa 15-mil ka ektaryang humayan nga apektado sa ting-init kapin libo niini ang dili na mapuslan sa mga mag-uuma.
Hinoon,gitin-aw ni Fajardo nga dili pa kaayo apektado ang Misamis Oriental apan mokabat na sa kapin uno milyones pesos ang natalang damyos sa paghapak sa kalamidad.
Giangkon usab sa Philippine Air Force ning syudad nga lisod kanila ang paglusad sa cloud seeding sa pipila ka bahin dinhi sa Region 10.
Kini tungod usab kay dili lalim ang pagpailin-ilin sa mga panganod aron hulugan sa asin nga magmugna ug ulan.
Matud ni T/Sgt. Jomar Legazpi nga adunay panahon nga magduha-duha sila sa paghulog sa asin gumikan sa kalisod sa location nga gipahimutangan sa twin engine aero commander plane.
Hisayrang 70 oras ang gigahin sa Task Force El Niño alang sa cloud seeding operation mahitabo lamang ang mga pag-ulan.
Dugtong niini,mihangyo ang Office of the Civil Defense Region 10 sa katawhan nga motabang sa paningkamot sa gobierno nga batukan ang kalamidad nga mihapak sa nasud.
Gisaysay ni OCD Dir. Carmelito Lupo angayang magdaginot ang katawhan pagamit sa tubig ug kuryente aron dili mosamot ang kalisod sa panahon diin gihadla pa sa El Niño phenomenon.(PIA)
Posted by MALINDANG HERALD ONLINE
|
at
1:56 AM
|
OZAMIZ CITY--KAMULO pa nga nagpanday ang Federated Women’s Organization sa Ozamiz City sa serye sa mga aktibidad subay sa kasaulogan sa National Women’s Month niining bulan sa Marso.
Gipahayag ni Marivic Kamiño, Women’s Coordinator sa buhatan sa City Social Welfare and Development, nga hingpit nang adunay naumol nga grupo sa mga kababayen-an ang 51 ka mga barangay sa Ozamiz.
Dili usab moubos sa tres mil ka mga ssakop ang Ozamiz City Federated Women’s Association sa pagkakaron.
Gipahayag ni Kaamiño nga gihatagan nila karon og atensiyon ug espesyal nga pagtagad ang mga kababayen-ang biktima sa bisan unsang matang sa pagpanglupig, diskirimasyon, paglapas sa ilang tawhanong katungod isip babaye ug pagpangabusong physical, sexual, mental ug verbal abuse.
Dili pa lamang dugay gihimo ang panagtago sa buhatan sa LGU ning siyudad tali sa hingtungdan ahensiya sa gobyerno ug sa taga LGU aron hisugtan ang mga issue, mga special nga balaud nga may kalambigitan sa mga kababayen-an sa tuyo nga ma address o matubag ang ilang mga reklamo.(RNG)
Posted by MALINDANG HERALD ONLINE
|
at
1:04 AM
|
OZAMIZ CITY--ALAYON sa kasaulogan sa fire prevention month, adunay mga fire drills nga gilusad sa mga tulonghaan ug mga nagkadaiyang establisemento.
Giingong mahinungdanong ang pagpahigayon og mga fire drills aron makakat-on ang mga estudyante ug publiko kon unsay buhaton sa panahon nga adunay sunog.
Gipahayag ni Fire Officer 1 Rolando Bondaco sa Bureau of Fire Protection (BFP) sa Ozamiz nga sukad sa buwan sa Enero 2010 hangtud sa pagkutlo niining taho walay pay natalang sunog sa dakbayan sa Ozamiz.
Subay niini, una nang gipahimatngunan sa Misamis Occidental Electric Cooperative II Incorporated (MOELCI II) ang publiko nga dili mag-overload sa ilang kuryente , pagamit og mga octopus connection nga maoy hinungdan sa sunog.
Nasayran nga ang usa ka bulan nga kalihukan nagdala sa tema nga "Sustaining Fire Prevention Thru Active Community Participation.”
Kahinumduman nga ang kasaulogan sa Fire Control and Prevention Month pormal sa gibuksan sa dakbayan sa Ozasmiz niadtong Marso 1.
Gisugdan ang kasaulogan pinaagi sa usa ka Santos nga misa sa Parokya sa Imakulada Concepcion nga gitambungan sa Fire Marshal mga bombero ug sa mga kawani sa BFP nga gisundan sa motorkada libot sa pipila ka piniling kadalanan sa dakbayan.
Gipahayag ni Bondaco, nga mahinungdan ang pagpahigayon og motorcade sa tuyo nga makuha ang atensiyon sa publiko dili lamang sa pagpamati sa serena o wangwang sa fire truck, apan ang mensahe nga makuha sa publiko nga angayang mag-amping karong panahuna gumikan kay dali rang moulbo ang kalayo gumikan usab sa kainit sa panahon.(RNG)
Posted by MALINDANG HERALD ONLINE
|
at
12:59 AM
|
OZAMIZ CITY--UPAT ka mga dagkong punto ang tinguha sa Provincial Alternative Agenda (PADA) nga himuong plataporma de gobiyerno sa mga kandidato ug ingon man sa posible nga mangatungdanan sa nasud.
Ang maong agenda naglangkob sa provincial land use and ecological plan, provincial agro-industry and enterprise plan, provincial social welfare plan ug provincial social peace plan.
Sa gipahigayon Civil Society Organizations (CSO) caucus gisaysay ang maong mga agenda.
Ang naasoyng kalihukan gipahigayon niadtong Marso 4 sa Johann’s Cuisine, Lam-an, Ozamiz City sa may alas nueve sa buntag hangtud na sa alas dosi sa udto, nga gitambungan sa mga sakop sa Civil Organization’s Caucus , mga bisita ug gisaksihan sa mga sakop sa Media sa Ozamiz.
Nasayran nga ang PADA napanday gumikan sa linangkob nga paningkamot sa 15 ka mga Civil Society Organization (CSO), kinsa mipaambit sa ilang matag organization agenda niadtong Agusto 12, 2009 pinaagi sa usa ka CSO Consultative Forum nga gipasiugdahan sa Freedom From Debt Coalition.-Western Mindanao Region.
Sila si Lucita D. Gonzales, Secretary General sa FDC-Western Mindanao Region , Ma. Benita G. Clamonte, Coordinator sa Justice and PEACE & Integrity of Creation Columban Mindanao, Jose Loreto O. Procianos sa MOPECO ug ni Roldan R. Gonzales, Executive Director Gitib, Incorporated maoy mibarog nga mga secretariat sa nasangpit nga kalihukan.
Ang ubang mga meyembro sa CSO Caucus sa Misamis Occidental naglakip sa JPIC, Youth Against the Debt, PAPED, Katawhan-MO, Banwana “Nak-Subanen, WEFORM, TFDP, AWARD, CAPEMO, OCSUDA, NASECORE og si Fr. Oliver MC Crossan.
Ang maong gropo naglaum nga ang mga aspiring politicians kinsa matinud-anong nagpakabana kalabot sa lunsay ug tinuoray nga kalambuan ug kabag-uhan makahimo sa pag-integrate sa PADA diha sa ilang mga plata porma de gobyerno.(NEPTALIE BATOLENIO & ROMERICKO GREGORIO)
Posted by MALINDANG HERALD ONLINE
|
at
12:58 AM
|
BALIANGAO,MisOc—Positibo nga usa ang namatay sa lima ka mga sakop sa usa ka pamilya nga nabiktima sa Red Tide niining lungsod.
Kini ang gikomperma sa Bureau of Aquatic resources (BFAR) sa dxDD-AM human mopagawas og warning ang nasudnong buhatan sa BFAR nga dili mahimong kuhaon, ibaligya ug kan-on ang mga kinhason gikan sa Morsillagos Bay gumikan kay positibo sa Red Tide.
Hinuon, nagdumili ang BFAR nga ibutyag ang ngalan ug bansagon sa biktima.
Partikular nga gitumbok nga apektado sa red tide ang Zamboanga del Norte ilabina sa Rizal nga nakaapekto usab sa kabaybayunan sa utlanang bahin sa Misamis Occidental ilabina sa lungsod sa Baliango ug Sapangdalaga.
Gipasabot sa BFAR nga dili lamang tungod sa toxic nga gibuga gikan sa mga minahan ang hinungdan sa pagtumaw sa red tide , apan gumikan sa sitwasyon og sa lihok sa tubig nga daling mosanay o modagsang ang mga bakterya nga maoy hinungdan sa food poisoning kon makaon sa tawo.
Hinuon ang ulohang buhatan sa BFAR namahayag nga mahimong makaon ang mga isda gikan sa apektadong lugar basta hinluan pag-ayo ug kuhaon ang tinai.
Gikompirma usab ni Vergie Valde , ang Officer In charge sa Fish Help Laboratory sa BFAR Provincial Office nga nakabasi sa Ozamiz nga padayon ang ilang pagmonitor sa mga dapit nga naapektuhan sa Red Tide.
Gipahayag ni Valde nga niadtong Oktobre sa nakalabayng tuig nagsugod na pagtaas ang kaso sa Red Tide partikular sa mga lungsod sa Punta Sulong sa Baliangao ug sa Sapangdalaga.
Niadtong Disyembre miubos og dyutay ang insidente sa Red Tide apan pagtikang sa tuig dos mil dies misaka og giutohang mas motaas pa ang kaso sa Red Tide ilabina niining paghapak sa El Nino Phenomenon.
Gidugang pa niini nga gilusad sa BFAR ang pag-eksamin sa Danao Bay sa longsod sa Plaridel subay usab sa request sa LGU sa Baliangao ug nasutang negatibo sa red tide ang maong lugar. (ROMERICKO GERGORIO)
Posted by MALINDANG HERALD ONLINE
|
at
12:58 AM
|
OZAMIZ CITY--HINGPIT na nga mitapos sa ilang pagtuon sa kahanginan kon School on the air on organic farming ang 262 ka mga mag-uuma kinsa mga official enrollees nga nagagikan sa nagkadaiyang lungsod ug dakbayan ning lalawigan sa Misamis Occidental.
Human sa 4 ka bulan nga pagtuon matag adlaw’ng Sabado pinaagi sa programang School on the air (SOA) on organic farming, gipahigayon niadtong Marso 3 ang ilang gradwasyon sa Farmers Training Center, sa Capitol drive, Oroquieta City.
Gipahayag ni Inday Cristy saplot, host ug magtutudlo sa naasoy’ng programa sa gobyerno nga kini ang unang higayon nga dili lang sa radio madungog ang school on the air kon dili lakip na usab sa TV .
Gidugang ni Saplot nga gibati siya og kadismaya sa nahitabo sa dakbayan sa Tangub diin wala sungko-a sa taga Department of Agriculture Tangub ang iyang mga tinun-ang mag-uuma. Nakurat na lamang siya sa dihang pipila ka mga mag-uuma gikan sa naasoy’ng dakbayan nangutana kon nagsugod na ba ang laing hugna sa maong programa.
Panawagan ni Saplot, nga dili lang unta sagolan ug ihiklin una ang isyu sa pamolitika. Hinuon, unahon una sa mga kandidato ang kaayohan sa kinabag-ang katawhan og dili ang kaugalingon interest.
Hisayran nga ang school on the air nagsugod kini kanidtong tuig 1970 pinaagi ni Boy Tersero kinsa maoy pinaka unang host o magtutudlo sa mga mag-uuma nga nagtuon.
Kahinumduman nga ang school on the air on organic farming mabati ning atong sibyaan dxDD AM matag adlaw’ng sabado 12:15 – 2pm ug Makita sa Kalamboan News Channel kon Ch. 13, Fil Products Ch. 18 ug Misamis Cable Ch. 18 sa susamang higayon.
Gitambongan ang maong kalihokan sa mga kadagkoan sa Department of Agriculture – Region 10, mga kawani sa Misamis Occidental agriculture office, Vice Governor Francisco Jun Paylaga, Governor Loreto Leo Ocampos , Boy Tee sa Peoples Milling ug uban pa.
Dako ang pasalamat sa mga mag-uuma ngadto sa buhatan sa Deprtment of agriculture Region 10 ingon man kang governor Ocampos kinsa mihatag ug dakong pagtagad sa mass media, aron usab masabwag ang pagtulon – an sa maayong paagi ug bag-ong teknolohiya sa pang-agricultura. (MAE AGOT DELARMENTE)
Posted by MALINDANG HERALD ONLINE
|
at
12:56 AM
|
MGA Tindahan Natin sa dakbayan sa Ozamiz o sa tibuok probinsya sa Misamis Occidental kadaghanan masinugtanon o wala mosupak sa mga kalagdaan nga gipatuman sa National Food Authority (NFA)
Kini ang gipadayag ni NFA Ozamiz human gihatud kadto kanila ang taho, nga 24 ka mga Tindahan Natin outlet sa probsinya sa Capiz gipaundang ang operasyon human mabuko sa NFA nga nagbaligya ug subra ka mahal nga NFA rice.
Hinuoon giangkon ni Mela Tanguamos, NFA Provincial Operation Officer, nga adunay taho nga adunay pipila ka Tindahan Natin Outlet nga miaksiyon ug supak sa ilang reglamento.
Busa padayon nilang gipalagsik paglusad ug inspekseyon sa mga Tindahan Natin Outlet.
Giawhag sa NFA ang publiko, lakip na ang Media, simbahan og uban nga nagpakabanang sector sa pag- report guilayon sa buhatan sa NFA kon may makitang Tindahan Natin outelt nga nagbaligya ug NFA rice nga subra kay sa gitakda nga prisyo.
Ang NFA Rice nagpabilin sa iyang naandang prisyo nga P18.50 matag kilo.
Samtang gipaniguto usab sa NFA nga adunay bastanteng supply sa bugas busa dii angyang kahadlukan ang posibling pagtaas sa prisyo sa bugas gumikan sa giingong pahnihit sa supply niini sa kaulohan.
Gisaysay Tanguamos nga dili mominos 79 mil ka sinakong bugas ang gikamada karon sa dagkong bodega sa NFA sa Gango, Ozamiz City busa dili kabalak-an nga momahal ang prisyo sa bugas.
Tubag kini ni Tanguamos human masayri nga sa kaulohan nagpasidaan ang mga Grains Retailers Federation nga momahal handtud sa dos pesos ang kada kilo sa bugas sa sunod semana.
Ang pahayag ni Tanguamos dason lamang usab sa gipaniguro sa nasudnong buhatan sa NFA didto sa kaulohan nga daghang stock sa bugas nga mapalit ang publiko.
Gidugang pa sa Provincial Operation Officer nga ang naasoyng pundong bugas sa mga NFA warehouses gituohang molungtad pa hangtud sa pagtapos sa unang kwarter sa tuig dos mil dies. (ROMERICKO NABONG GREGORIO)
Posted by MALINDANG HERALD ONLINE
|
at
10:39 AM
|
LABING taas na ang level sa kaamguhan sa taga Ozamiz sa natad sa pagbantay o pag- amping sa pagpabuto og mga firecrackers ug mga fireworks sa panahon sa pagsugat sa bag-ong tuig.
Kini human masayran sa dxD-AM News nga taliwala sa dagkung dinahunog sa pabuto sa mianging pagsaulog sa bag-ong tuig, way bisan usa nga biktima sa pabuto ang nadala sa mga tambalan sa Ozamiz.
Kamatuoran niini, sa gihimong hospital roundup nasayran managsamang way pasyente nga nasulod bunga sa pabuto ang Mayor Hilarion A. Ramiro Senior Regional Training and Teching Hospital (MHARS RTTH), SM Lao Hospital, Faith Hospital ug Medina General Hospital.
Kini ang labing unang higayon nga way bisan usa ka biktima sa pabuto nga nalandig sa tambalanan sa Ozamiz.
Kahinumduman nga gipailawom sa White Alert ang tanang hospital sa gobyerno sa miaging pagsugat sa bag-ong tuig aron maatiman sa husto ang mga tawong biktima sa fire crackers related incident.
Samtang ang Department of Health Provincial Office wala makatala og daghang insidente sa firecrackers ug fireworks related incident sa tibuok probinsiya sa Misamis Occidental sa nakalabayng pasko ug sa pagsugat sa bag-ong tuig dos mil dies.
Kini ang gikompermar ni Engineer Mercilyn Tinapay kawani sa DOH Technical Division.
Gipahayag ni Tinapay, nga bugtong usa lamang ka kaso sa nabuthan sa pabuto ang ilang namonitor sa Misamis Occidental Provincial Hospital.
Walay nadawat nga report ang DOH Provincial Office gikan sa mga kalungsuyran og siyudad ning lalawigan nga nagtug-an nga daghang ang nabiktima sa pabuto.(ROMERICKO NABONG GREGORIO )
Posted by MALINDANG HERALD ONLINE
|
at
10:37 AM
|
MOABOT sa 964 ang nadugang sa gidaghanon sa mga bag-ong butante nga nakaparehistro sa Comission on Elections (COMELEC) sa nakalabay nga lima ka adlaw nga extended voters registration sa lalawigan sa Misamis Occidental.
Kini ang nahipos nga kasayuran sa dxDD News gikan kang Cherry Daligdig, ang Election Assistance Officer sa Misamis Occidental Provincial Office nga nakabasi sa Oroquieta City.
Kahinumduman nga gumikan sa daghang mga hangyo nga motakda og adlaw ug special voters registration, gilusad sa COMELEC ang 5 day extended voters registration niadtong Desyembre 21 hangtud na sa 23 ug Desyembre 28 hangtud na sa Desyembre 23.
Sa pagkakaron ang Misamis Occidental nga gilangkuban sa Distrito Uno ug Distrito dos aduna nay kinatibuk-ang gidaghanon nga 306,116 ka mga official registered voters alang sa election karong Mayo.
Sa pikas nga bahin, human sa gipahigayong 5 days extended voters registration, gipangandaman na usab COMELEC ang pagtudlo sa mga botante kon unsaon sa pagbutar sa 2010 elections gamit na ang automated machines.
Sa probinsya sa Misamis Occidental gisugdan na ang demontrasyon kalabot sa paggamit sa nasangpit nga modernong paagi sa pagbutar.
Gipahayag Daligdig nga unang hugna sa demonstrasyon gihimo mismo sa COMELEC Provincial Office sa Oroquieta City, niadtong Desyembre 19, 2009.
Samtang sunod nga demonstrasyon himoon sa longsod sa Don Victoriano sa Enero 11 sa buntag.
Himuon usab ang demonstrasyon nianang pagkahapon sa mao gihapon nga adlaw sa lungsod sa Bonifacio. (Romericko Nabong Gregorio )
Posted by MALINDANG HERALD ONLINE
|
at
10:35 AM
|
TANGUB CITY —Nangandoy ang pipila ka mga gagmay’ng negosyante ning syudad nga kaduha magsaulog ang syudad sa pasko aron kaduha usab ang pagpahigayon sa Christmas Symbols Festival dinhi.
Gibutyag ni Geneper Cuambot, usa ka negosyante og balut, sa programa sa radyo nga Sayran ta kay Mayor Jenny Tan , ang iyang pangindahay nga kaduha-on na ang maong kasaulogan.
Migawas ang maong tinguha human iya usab nga gibutyag ang dako’ng natabang sa maong selebrasyon sa iyang negosyo.
Hisayran nga halos mi-triple ang iyang kita’ng salapi sa pagsugod palang sa Christmas Symbols Festival ug nagpadayon ang maayong kita niini hangtud ning panahuna.
Gawas sa salapianong natabang sa maong kasaulogan ubay-ubay usab ka mga pamilya nga namaligya og balut ang nakapa-eskwela sa ilang mga anak tungod lang sa pagpamaligya og balut
Gipamatud-an usab ni Bobby Mangusara, usa ka negosyante og mango shake ug mga fishcrackers ang dako’ng epekto sa maong kasaulogan sa iyang pinansyal nga kahimtang.
Matud pa ni Bobby nga sa iyang puhonan nga P 2,000 sa unang adlaw sa selebrasyon miabot kini og P 6,000 kapin sa pagtapos sa maong adlaw lang.
Gawas sa duha, migawas usab basi sa datos nga nakuha gikan sa Kamugna-an Daily Sales Christmas Symbols 2009 nga ubay-ubay ka mga gagmay’ng negosyante ang nakapahimulos usab sa maong kasaulogan.
Migawas nga gikan sa P 2,000 ngadto na sa P 30,000 ang kita sa nagka-lainlaing negosyo nga gipahigayon sulod sa city plaza lakip na niini ang Thirsty nga namaligya og shakes ug drinks nga mikita og P 8,000 sa unang adlaw sa selebrasyon.
Ang manag-asaw’ng Eking ug Naomi Macan nga namaligya og pop-corn mikita og
P 5,000 sa unang adlaw palang.
Subay niini, sila nanghinaot nga magpadayon pa ang among programa sa syudad sa punot nga dako kayo kini og natabang sa ilang salapianong panginahanglan.
Posted by MALINDANG HERALD ONLINE
|
at
10:33 AM
|
