DXDD-AM NEWS ONLINE

TALIWALA sa pagsulod ni Misamis Occidental governor Loreto Leo Ocampos sa Liberal Party dili kini makapaabot sa suporta sa provincial chairman sa nasangpit nga partido.

Sa pagpakighinabi sa dxDD-AM, gipadayag ni Ozamiz City Vice-mayor Carlos Patricio ‘Kaloy’ Bernad nga medyo nahiubos siya sa pagsulod sa gobernador gumikan kay wala kini moagi kaniya isip mao ang provincial chairman sa Liberal Party.

Gipadayag ni Bernad nga igo lamang siya nga gitawagan sa Liberal Party ug gipahibalo nga gidawat na si Ocampos nga wala man gani siya pangayui sa iyang rekomendasyon.
Apan kon gihatagan pa siya og higayon nga makasusi sa aplikasyon ni Ocampos iya gayud nga ipadayag ang mga negatibong posibleng sangputan.

Gisaysay ni Bernad nga si Ocampos adunay problema sa iyang pagkamatinud-anon sa unang partido niini nga Lakas-Kampi-CMD ug dili siya gusto nga mahitabo kini sa Liberal Party.

Hinuon, dili na niya kuwestiyonon ang pagsulod sa gobernador apan iyang gipasabot nga dili kini niya suportahan sa pagka-kongresista sa ikaduhang distrito gumikan kay una na niya nga gisaad nga si Ozamiz City Mayor Reynaldo Parojinog, Sr., ang iyang suportahan.

Lakip nga dili makapaabot sa suporta ni Bernad si Ozamiz City councilor Constancia ‘Connie’ Lim tungod kay si Councilor Nova Princess Parojinog-Echavez ang iyang suportahan sa pagkamayor.

Si Parojinog ug Echavez daan na nga gisaad ni Bernad nga iyang guests candidate sa Liberal Party.

by Adonie Decina

SA dili madugay mapahimuslan na sa mga tambalanan nga gidumala sa kagamhanang probinsyal sa Misamis Occidental.

GIISIP ni Mayor Reynaldo ”Aldong” Parojinog Sr., nga usa ka bililhong regalo alang ka niya karong pasko gikan sa Kahitas-an gumikan sa wala damhang posisyon nga nasangon ka niya human siya napili isip standard bearer sa Lakas-Kampi-CMD sa second district sa Misamis Occidental.

GIKONDINA sa kinatibuk-ang komunidad sa mga sakop sa media sa Misamis Occidental aqng nahitabong linuog nga pagpatay sa mga sakop sa media nga nalakip uban sa 50 ka mga inosenting gipamatay niadtong Nobiyembre 23.

Nahitabo ang pagpatay sa Maguindanao.

Sa sulat nga pagkondina nga gipagawas sa National Union of Journalists (NUJP) Ozamiz City chapter sa pagpanguna sa chairman niini nga si Ryan Rosauro sa Philippine Daily Inquirer gipadayag niini nga ang 20 ka mga tigbalita igo lamang nga mihimo sa ilang tahas sa dihang nahitabo ang pagdagit ug pagpamatay kanila.

Gipasabot sa maong sulat nga ang mga sakop sa media usahay mapagan sa hilisgutanan sa politika diin ang maong lihok kinahanglan nga ikondina sa atong giingong ‘civilized society’.

Lakip ang NUJP-Ozamiz nga nanawagan alang sa hustisya sa mga nabiktima diin kinahanglan nga kini hatagan og dakong pagtagad sa gobiyerno.

DAKO ang pagtuo ni Ozamiz City Vice-mayor Carlos Patricio ‘Kaloy’ Bernad nga ang mosunod nga presidente ug bise-presidente sa nasud nagikan sa Liberal party nga iyang gipasilungan.

Gipadayag ni Bernad nga iyang napili ang Liberal Party ilabina nga iyang nakita nga kini adunay hustong direksiyon sa natad sa kalamboan sa katawhan.

Gisaysay sa bise-mayor nga sa pagkakaron ang tandem nila ni Senador Noynoy Aquino ug Mar Roxas mao ang nag-una sa tanang mga tandem sa pagka-presidente ug ingon man sa pagkapresidente.

Gumikan niini gituohan ni Bernad nga daghan ang mga politico nga nagtinguha nga mopasilong usab sa maong partido.

OZAMIZ CITY: Wala pa gihapoy mga pulong nga gibungat si Ozamiz City Mayor Reynaldo ’Aldong’ Parojinog Sr., sa posisyon nga iyang daganan sa umaabot nga piniliay karong 2010.

OZAMIZ CITY: Luwas nga pagtugpa ug paglupad sa eroplano sa Ozamiz City Airport usa sa gihatagan og prayoridad sa Sangguniang Panglungsod.

Gipasabot ni Vice-mayor Carlos Patrico ‘Kaloy’ Bernad nga duha ka impotanteng butang ang gikonsiderahan sa konseho, una ang luwas nga pagsakay sa mga pasahero ug ekonomikanhong kahimtang sa siyudad , lalawigan ug kanait nga dapit.

Ang Committee on Laws, chaired by Honorable City Councilor Irene Luansing Jr. ug ang mga sakop niini nga sila si konsehal Taryn Mecaros, Bebie Neri, Bobby Jiminez ug Rustom “Loloy” Parojinog nagpahigayon og committee hearing niadtong Huwebes sa ordinansa nga naglatid sa lagda ug reglamento alang sa luwas nga paglupad ug pagtugpa sa eroplano sa Airport ning siyudad.

Sa hearing nahimong usa sa seryusong gihisgutan ang sugyot nga unod sa maong ordinansa nga hingpit nga idili ang pagpalupad og tabanog sa gilay-on nga sieti kilometros gikan sa airport o idili gyud sa tibuok siyudad.

Sa nasangpit nga pagdungog gipasabot Ozamiz City Air Transportation Office Manager Napoleon “Nap” Bail nga mas maayo ipatuman sa siyudad ang pangkinatibbuk-an nga pagdili kun total ban sa pagpalupad og tabanog gumikan kay naghatag kini og karisko sa eroplano nga motugpa ug molupad sa tugpahanan ning siyudad.

Samtang misugyot usab ni Mecaros nga I regulate lang ang pagpalupad og tabanog pinaagi sa pagkutop sa gitas-on sa nylon nga gamiton, gidogayong ug ang piho nga bulan sa pagpalupad.
Dugang gihisgutan ang plano nga pagdili og pagbuhi og mga langgam nga binuhian sama sa salampati sa musunod nga barangay; Labo,Gango,Bacolod ug Molicay aron malikayan nga mahigop sa makina sa eroplano nga moresulta sa paghunong sa andar niini nga mosangpot sa gikahadlokang trahedya.

Gumikan niini gihangyo ni Luansing si Bail nga kuhaon ang hunahuna sa mga piloto sa mga importanting probisyon sa ordinansa ug ipahigayon ang public hearing sa labing dali nga panahon ilabina nga ang sugyot ordinansa mopahamtang og silot sa makalapas niini.(Fernando G. Dumanjug, Office of the Vice Mayor)

OZAMIZ CITY: Vice-mayor Carlos Patricio ‘Kaloy’ Bernad nisalmot sa Liberal Party (LP) National Directorate Assembly sa kaulohan isip usa sa mga delegado sa Region 10 nga nagagikan sa Misamis Occidental.

Uban sa bise-mayor si Atty. Ronnie Tapayan misakay sa Cebu Pacific morning flight niadtong Nobiyembre 16 sa Ozamiz City Airport aron makatambong sa panagtigom sa mga opisyal sa partido gikan sa kaulohan ngadto sa mga local leaders sa mga rehiyon sa tibuok nasod.

Una niini natudlo nga usa sa mga delegado si Bernad alang sa nahisgutan nga kalihukan pinaagi sa usa ka caucus atol sa Mindanaowide LP General Assembly sa Budgetel, Cagayan de Oro City nga giapilan sa mga delegado gikan sa Rehiyon 10, 9,11, 12, Caraga ug ARMM.

Si Bernad gitudlo nga chairman sa LP Misamis Occidental ug gitahasan sa pag-organisa sa han-ay sa mga kandidato sa lalawigan.

Si Bernad nipayag og suporta sa LP samtang ang partido nihatag usab og pagsalig kaniya taliwala nga wala pa siya maka take oath sa partido.

Hinuon gihimo na ang arrangement alang sa iyang pagpanumpa sa partido ug mahibaw-an karong adlawa ang mahimong up date niini. Apan daan nang nagpadayag ang mga opisyal sa partido nga kon dili maka take oath si Bernad sa kaulohan mahimo kini buhaton sa laing dapit o kaha mismo sa lalawigan sa Misamis Occidental kun ugaling mahinayon ang gikatakda nga pagbisita ni Sen Noynoy Aquino ug Mar Roxas sa Dipolog City ug MisOc. sa Nobiyembre 27 ug 28. ( Nanding Dumanjug, Office of the Vice Mayor)

OZAMIZ CITY: Ipakita sa tibuok nasod nga aktibong naglihok ang Red Cross Youth, Ozamiz City Chapter ug andam nga motabang sa mga kalihukan sa pagtabang sa higayon nga adunay mahitabong kalamidad dili lang sa siyudad o lalawigan kon dili sa bisan asa nga dapit.

Gipasabot ni Charice Mae Salcedo, President, Chapter Youth Council, Philippine National Red Cross (PNRC) Ozamiz nga ang nahisgutan nga tumong maoy unod-mensahi sa ilang gipahigayon nga Pledge Run “ Batan-on Dagan Na” 2009 niadtong Sabado sa buntag.

Gipahayag ni Vice Mayor Kaloy Bernad, Chairman of the Board, PNRC Ozamiz ang pagpasalamat sa kaaktibo sa mga bantan-on nga nagtinguha sa pagtabang sa katawhan ug andam nga mosuporta aron makab-ot ang bililhong tinguha niini.

Gipadayag sa besi mayor atol sa awarding ceremony nga gipahigayon sa City Hall ning siyudad nga alang kaniya usa ka makahuloganon nga ang unang pagsugod sa kalihukan sa red cross youth ning siyudad nga gihimo pinaagi sa usa ka marathon nga nagsugod mismo sa City Hall ning siyudad diin nakatatak ang ngalan sa iyang amahan nga si kanhi Mayor Dongdong Bernad ug didto niagi sa dalan Don Anselmo Bernad diin natatak usab agig pagpasidungog ang ngalan sa iyang apohan nga kanhi gobernador sa Misamis Occidental.

Gipadayag usab ni Salcedo nga andam siya ug ang iyang mga sakop nga motubag emergency calls bisan pa sa laing dapit aron makatabang sa ipahigayon nga mga relief operations ug pagsalmot sa nagkalain laing kalihukan sa mga batan-on subay sa tumong sa PNRC.

Subay niini nanawagan sa si Vice Mayor Kaloy Bernad sa uban pang mga bantam-on nga mosalmot sa kalihukan sa red cross ning siyudad.

Ang mga winners sa Pledge Run: “ Batan-on Dagan Na” 2009: Boys Category; first Prize Thagui, Ezrhael; second prize Agapay, Jason, third prize Villanibe,Rey; Girls Category: first prize Intong, Melanie; second prize Delos Reyes, Emily; Consolation Prizes: Glen Soriano, Roland Agapay, Romer Bolando, Lordson Tac-an, Dhen Michael Similatan, Marlon Sabuero,Abelano Pagalan, Kieth Crosio, Roldan Arcellas, Albert Blanco ug Melfrich Pacaldo. (Nanding Dumanjug, Office of the Vice Mayor)

OZAMIZ CITY: Kusganong misupak sa House Bill 24 ug nanawagan sa dinaliang pagbasura niini.


Kini lig-ong gipadayag pinaagi sa giuyonan nga SP Resolution No. 272-09 nga hiniusang giduso sa mga sakop sa konseho niadtong Oktubre 19 ug giaprobahan ni City Mayor Aldong Parojinog, Vice Mayor Kaloy Bernad.


Sa dokomento nga gipamatud-an ni Atty. Ronnie Tapayan, secretary to the Sangguniang kusgnong gipasabot niini nga ang HB24 supak sa equal protection clause sa batakang balaod ug sa Ruling sa Supreme Court.


Ang HB 24 nagtumong nga himuong siyudad ang katloan ka mga lungsod nga giisip nga capital town sa mga probinsiya nga walay dakbayan bisan pa nga dili makatuman sa bag-ong financial requirement nga mokabat sa usa ka gatos ka milyon ka pesos aron mamahimo kining hingpit nga siyudad.

Samtang sa hukom sa kurte suprima sa kaso LCP VS. COMELEC gibarugan sa labing taas nga hukmanan nga ang tumong sa section 10, article X sa batakang balaod mao ang pagsiguro nga ang pagmogna og mga dakbayan ug uban pang local government units kinahanglan nga patas nga motuman, walay pagpihig nga mga basihanan nga nakasukad lamang sa Local Government Code.


Gidogang sa pagpasabot nga walay egong kalainan nga mahimong bug-at nga rason nga dili musunod sa sukaranan ang mga capital towm sa mga probinsiya nga walay siyudad nga dili musunod sa lagda sa pagkahimog siyudad.


Angayang masayran nga ang pagkahimog siyudad sa nahisgutang 30 ka mga munisipalidad magdulot og pagkunhod sa pahat sa Internal Revenue Allotment sa mga kasamtangang siyudad sa tibuok nasod nga gikadahadlokan nga makaapekto sa pagpatuman sa mga programa ug proyekto ug ang paghatod ug batakang sebisyo ngadto sa katawhan diin kabahin niini ang paghatag og hustong suhulan sa mga kawani sa local nga kagamhanan subay sa gingbut-an sa balaod. ( Nanding Dumanjug, Office of the Vice Mayor)

OZAMIZ CITY: Pagtaas sa gidaghanon sa mga nagparehestrong botante sa dakbayan sa Ozamiz nagtimaan sa pagsaka sa politikanhong pagpakabana.


Gipahayag ni Vice Mayor Kaloy Bernad nga kini usa ka timailhan nga daghang katawhan ning siyudad ang nangandam nga mogamit sa ilang gahum alang sa pagmogna og usa ka maayong panggoberno pinaagi sa pagamit sa ilang batakang katungod sa pagbotar sa hustong kandidato.


Kini gipadayag sa besi mayor human masayri nga mokapin sa 70 mil ka mga botante ang kinatibuk-ang nagparehestro sa buhatan sa COMELEC nga naglangkob sa mga batan-on nga nagpangidaron og 18 anyos pataas, hamtong ug idaran.


Niadtong bulan sa Septembri ning tuiga ang kinatibuk-ang botanti nga narehistro moabot sa 67,356 ug padayon ang pag-umento niini hantod sa Nobeyembri 3, ang gitakda nga lugway kun extension pagpangrehistro sa mga botante.


Niadtong nakalabayng eleksiyon ang siyudad may kinatibuk-ang 62,814 ka mga botante.


Ang rehestradong botante nagagikan sa 51 ka mga barangay ning siyudad nga may kinatibuk-ang 528 ka mga presingto nga kabahin niini ang 132 ka clustered precincts.


Gipasabot ni Vice Mayor Bernad nga ang gahum sa pagbotar sa kapin sa 70 mil ka mga botante sa Ozamiz maoy mohukom sa kaogmaon sa siyudad o sa probinsiya sa musunod nga mga tuig.



Subay niini gipahinumduman sa besi mayor ang mga botante sa kabahandianon sa ilang gahum sa pagbotar ug gamiton gyud kini sa husto inay ibaliwala lamang ug ibaligya sa mga kandidato nga mamalit og mga botante.


Gidogang sa besi mayor nga makadaghan nang higayon nga gihatagan og kahigayonan ang katawhan sa hustong pagamit sa ilang gahum apan makadaghan usab kini nagkulang sa hustong pagamit busa hinay ang paglambo sa nasod.(NANDING DUMANJUG)

OZAMIZ CITY: Ipahigayon sa dakbayan sa Ozamiz ang pinakaunang pagbansay sa Internal Security Operation (ISO) ug Special Weapons and Tactics (SWAT) sa tibuok rehiyon 10.


Sa launching sa ISO and SWAT Course niadtong Nobembre 5, sa city hall ground, si Police Chief Superintendent Leocadio SC Santiago, Jr., ang director sa Special Action Force sa Philippine National Police midayeg sa inisyatiba ni Mayor Reynaldo ‘Aldong’ Parojinog, Sr.


Sumala pa ni Santiago ang local government unit sa Ozamiz migahin og pundo alang sa pagbansay sa PNP ug police auxiliary.


Kini nagtumong pagsulbad sa krimen ug pagpakigbatok sa insurgency.


Dugang pa niya ang police auxiliary dako og ikatabang nga mapabiling malinawon ang dakbayan. Sila nakalila sa mga tawo sulod sa ilang barangay.


Hinuon, adunay laing mga pagbansay nga ipatuman aron mas mapalambo ang kahibalo ug kahanas sa mga polis ug auxiliary.

OZAMIZ CITY: Gisaulog ni city councilor Nova Princess Parojinog-Echavez sa Ozamiz City ang iyang birthday nga walay sagol sa pamolitika.

Kini ang iyang gipamahayag atol sa concert nga gipahigayon sa Cotta Square, Nobembre 5, gabii sa Huwebes.

Usa sa iyang gipasalamatan si Cris Mahilac, usa ka residente sa lungsod sa Sinacaban, Misamis Occidental ug tag-iya sa Mindanao Express, kansang mga sakyanan nagdagan sa Metro Manila ug ubang dapit sa Luzon.

Sumala pa ni konsehal Nova si Mahilac ang miisponsor sa Side A ug Shamrock Musical Band, mga sikat mga grupo nga nakahatag og kabibo sa mga residente.

Mipakita usab sa ilang mga talento ang mga Ozamiznon sama sa pagsayaw sa kabataan, pag-awit sa kadaghanan sa happy birthday nga ginuntan sa pagpalong ni konsehal Nova sa kandila.

Alas 10:00 ang takna, huwebes sa gabii gipahigayon usab ang fireworks display sulod sa cotta. Kini milungtad og 15 ka minutos.

Nasayran nga gibisitahan sa mga mayores ug kongresista sa lalawigan sa Misamis Occidental ang birthday party ni Echavez.

Si second district representative Herminia ’Hermie’ Ramiro miadto sa salo-salo nianang adlawan, didto sa pinuy-anan sa konsehal sa barangay Bagakay.

Pagka-gabii, uban sa salo-salo sa paninapon si Tangub City mayor Jennifer Wee-Tan uban sa iyang kapikas nga si Atty. Philip Tan, Oroquieta City mayor Jorge Almonte, Clarin mayor David Navarro ug Ozamiz City mayor Reynaldo ‘Aldong’ Parojinog, Sr., sa Bethany Garden sa barangay Aguada, Ozamiz City.

Didto usab ang grupo sa mga magpapatigayon, magtutudlo, mga konsehal sa dakbayan sa Ozamiz, barangay officials, higala, kanhi magtutudlo ni Nova samtang nag-eskuwela, relihiyoso ug uban nga sektor.

Usa sa mga espesyal nga dinapit si Prospero Pichay sa birthday party ni city Echavez.

Gibisitahan ni Pichay ang pinuy-anan sa konsehal. Iyang nakita nga nagpunsisok ang daghang tawo. Pinakadaghan kanila mga Ozamiznon.

Sumala pa ni Pichay, bugtong niya nga tuyo pagbisita sa dakbayan mao ang pagtambong sa birthday party ni konsehal Nova.

Si Pichay usa sa mga higala ni mayor Parojinog. Siya usa ka residente sa Surigao City ug nagsilbe sa partidong lakas.