DXDD-AM NEWS ONLINE

LOKAL nga kagamhanan sa Ozamiz City nanawagan sa katawhan, mga kanait nga lokal nga kagamhanan ug kagamhanang probinsiyal nga mohatag og kinasing-kasing nga tabang sama sa salapi, pagkaon ug uban pang bahandianong butang nga gikinahanglan matag adlaw, alang sa mga biktima sa bagyong Ondoy sa Metro Manila.

Gipasabot ni Ozamiz City Vice-mayor Carlos Patricio ‘Kaloy’ Bernad nga kini nga buhat sa kalooy maoy agig pagpadayag og pasalamat sa Labawng Makagagahom sa paghatag niini og proteksiyon sa katawhan sa lalawigan busa wala makasinati og katalagman ang siyudad ug ang tibuok lalawigan sa Misamis Occidental sa nakalabay nga panahon.

Gipahibalo sa besi mayor ang katawhan nga ang mga shipping companies ning siyudad andam nga mohatod sa bisan unsang tabang nga ilang ikatunol sa mga biktima sa bagyong Ondoy pinaagi sa ilang pagpakig-alayon sa City SocialWelfare and Development (CSWD) sa Ozamiz o sa ilang matag buhatan sa CSWD sa lokalidad o sa probinsiya.

Gipasabot usab sa besi mayor nga agig pagpakitag sakripisyo, bisan apiki sa panalapi, ang siyudad mogahin og P200 mil nga kuhaon gikan sa tres milyones pesos nga 5 percent Calamity Fund kabahin sa P60 M nga IRA Differential sa siyudad. Kini nga pundo dili mahimong gamiton sa lain nga katuyoan samtang nagpadayon pa ang tuig nga gigahinan alang niini.

Gipasabot og dogang sa besi mayor nga ang paghatag og tabang pinansiyal sa lokal nga kagamhanan ngadto sa ubang dapit nga kuhaon gikan sa calamity fund gihimo na kini sa kapid-an ka higayon sama sa paghatag og financial assistance sa Lanao Del Norte human giatake sa Moro Islamic Liberation Front nga nisangpot sa pagbakwit sa kapin sa dies mil ka mga lomolopyo paingon sa Ozamiz.

Una nang nagkasabot sila si mayor Aldong Parojinog ug besi mayor Bernad kalabot niini ug gidasonan sa usaka konperensiya kagahapon sa buntag didto mismo sa buhatan sa mayor.