DXDD-AM NEWS ONLINE

Grupo sa  mga  kapitanes sa dakbayan sa Tangub musuporta sa  kandidatura ni Vice Mayor Kaloy Bernad sa pagkabernador sa Misamis Occidental. 

Dili pa lang dogay, ang maong grupo  nakigkita  sa  besi mayor nahisgutang  dakbayan ug nipadayag sa ilang suporta gumikan sa ilang lig-ong pagtuo nga kini maoy musunod ug mopadayon sa mga  mithi sa maayong pagdumala nga gibilin sa iyang apohan nga si kanhi gobernador Don Anselmo Bernad ug sa amahan niini nga si kanhi Ozamiz City Mayor Fernando "Dongdong Bernad.  

Samtang sa kabahin ni Tangub City Mayor Jennifer Tan gipadayag niini nga dili lisod nga makakuha og suporta  si Bernad sa ilang dakbayan ilabina nga nasayod ang mga tangubanons nga wala ni sukad nagkabingkil ang banay nga Bernad ug Tan sukad pa niadtong panahon sa pagdumala ni kanhi Gobernador Alfonso Tan ug Mayor Dongdong Bernad.  

Angayan masayran nga ang dakbayan sa tangub ang ikatulong siyudad sa Misamis Occidental nga may kinatibuk-ang gidaghanon sa mga lomolopyo nga  57mil ug moabot sa 30 mil ka mga botanti.  

Subay niini giisip ang  maong siyudad nga usa sa labing importanting dapit sa  mga  mokandidato sa provincial level. 

Sa  kabahin ni Vice Mayor Kaloy Bernad iyang gipasalamatan ang mga kapitanes ug mga opisyal sa dakbayan sa Tangub nga wala mahikalimot sa  legasiya sa iyang apohan ug amahan  ug kini mas nakadasig kaniya sa pagpalig-on sa iyang kandidatura.( Nanding Dumanjug, Office of the Vice Mayor)