DXDD-AM NEWS ONLINE

Ang besi mayor niduso sa certificate of candidacy pinaagi sa pag-apil sa usa ka santos nga misa sa may alas dose sa udto sa Cathedral kinsa siya ang gitahasan sa pagbasa sa unang pagbasa sa pulong sa Dios nga nagpasabot sa pagbag-o sa pamonoan sa usa ka hari nga nahaom sa iyang tinguha nga mopabarog sa bag-ong pamonoan sa lalawigan sa Misamis Occidental. Gitugot usab sa kahigayonan nga siya ang mohimo sa offertory sa santos nga misa nga naghatag kaniya og kahigayonan nga itanyag ang iyang kaugalingon sa Labawng Makagagahom alang sa katawhan sa lalawigan.

Human sa Santos nga Misa sa Cathedral,gipahigayon ang usa ka convoy paingon ngadto sa Comelec Oroqieta diin namatikdan nga daghan sa iyang mga supporters nga naglangkob sa mga sakop sa pamilya, loyalista sa iyang apohan nga si kanhi Misamis Occidental Governor Don Anselmo Bernad ug sa iyang amahan, kanhi Ozamiz City Mayor Fernando “Dongdong Bernad”, iya mismong mga supporters kinsa wala damha bolontaryong niapil sa panon sa mga sakyanan aron sa pag-uban ug paghatag og segiridad sa besi mayor sa pagduso niini sa iyang sertipiko de kandidatura.

Pag-abot sa besi mayor sa besi mayor buhatan sa comelec sa lalawigan nga nahimotang sa dakbayan sa Oroquieta, mainitong gisugat siya sa iyang mga ligdong ug inpliwensiyadong mga paryenti sa nasangpit nga dakbayan.

Nakita sa besi mayor nga ang lig-ong suporta sa ilang banay nga nilipang sa tibuok Misamis Occidental sukad pa sa pamonoan sa iyang apohan nga kanhi gobernador ug amahan nga kanhi mayor sa Ozamiz kinsa nagbiling og maayong legasiya sa pangagamhanan, mga loyalista sa banayng bernad, ang iyang kalig-on ug abilidad, pagsalig sa katawhan, labaw sa tanan ang panalangin sa labawng makagagahom, mao ang mopapas sa gahom sa kuwarta nga gisaligan sa iyang kaatbang sa election sa pagkagobernador sa 2010 elections.

Ang bando sa besi mayor lig-ong nagtuo nga ang Misamis Occidental mahimong duol sa Malacanang kon ugaling pilion siya sa katawhan nga gobernador sa lalawigan gumikan usab sa lig-ong tilimad-on nga si Senador Noynoy Aquino mao ang musunod nga presidenti sa nasod ug si senador Mar Roxas ang mamahimong besi presidenti ubos sa ilang bando sa Partido Liberal. (Nanding G. Dumanjug)